كيس اللحمة

يا خبر ! نسيت اطلع كيس اللحمة من الفريزر ......
فجأة بدون مقدمات تشهق الست وتفتكر انها نسيت تطلع كيس اللحمة من الفريزر .... وتعرق وتحتاس وتغرق فى شبر ماية. ... اكن الدنيا وقفت خلاص على كيس اللحمة .
ويا سلام بقة لو واحدة مكبرة دماغها وجوزها هو اللى مركز فى كيس اللحمة ...تبدأ ب " طلعتى يا هانم كيس اللحمة " ......تتنح الست شوية وفجأة كأن عقرب لدعها تشهق " هيه ..... نسيت "
طبعا الزوج ما يتوصاش .... صوته يعلى و يبدأ الاستهزاء بالست المهملة اللى بتنسى تطلع كيس اللحمة .... ويجيب لها من القديم والجديد اكنه عايش مع أمنا الغولة ومستحمل ....ويا سلام بقة لو هو من بتوع
( ابن أمه  ) يروح يشتكى ان أمنا الغولة اللى قاعدة معاه مهملة و بتنسى تطلع كيس اللحمة وبتجوعه .....والراجل اللى زى دة اكيد حيكون زى الست الوالدة حتلاقيها كهينة كدة و قال يعنى يصعب عليها ابنها ان مراته مهملة و بتنسى تطلع كيس اللحمة ...وعليها وعلى أخواته عدل وخالاته والعيلة كلها تعرف ان الواد ياعينى وقع وقعة سودة مع واحدة بتنسى تطلع كيس اللحمة .... ويبدأ المجلس الأعلى للعائلة الكريمة فى الانعقاد لمناقشة موضوع أمنا الغولة اللى عايشة مع ابننا و بتنسى تطلع كيس اللحمة ......اول اقتراح فى الإجتماع واللى الكل يتفق عليه ان الست دى ما تنفعش وأنها مش حتعرف تربى عيال ولا تصون بيت المحروس .... حتخليه خرابة .
الاقتراح التانى يختلف عليه أعضاء المجلس .... شوية يقترحوا تغيير الست دى على اساس يعنى انها فانلة ممكن نبدلها بواحدة تانية لو مش قد المقاس ....والشوية العاقلين يقترحوا ان المحروس يصبر عليها شوية يمكن ربنا يهديها و تتعلم تطلع كيس اللحمة من الصبح بدرى زى الست مرات ابن عم جوزها كانت برضة بتنسى تطلع كيس اللحمة وربنا هداها لما اتعلمت تقول الأذكار اليومية وبقت بتفتكر تطلع كيس اللحمة . وفيه شوية من أعضاء المجلس الموقر شايف ان الجوازة دى خازوق والمحروس لبسه علشان هو اللى اختار بنفسه من غير ما يرجع  لمشورة الست الحاجة وخالاته.
طبعا مفيش حد يقترح أبدا او يلمح ان المحروس يطلع هو كيس اللحمة ويخلصنا من المشكلة دى اللى بتخرب نص بيوت المصريين . مفيش حد يقول ان الست اللى نسيت تطلع كيس اللحمة مخها كان مشغول بابن كيس الجوافة اللى بترضعه وبتغيرله وبتراعيه . مفيش حد يقول طيب وماله ما تقضيها اى اكله وخلاص هى الدنيا ماخربتش يعنى دى حاجة هايفة .
طبعا الست بعد المشاجرات والمشاكل فى اول جوازها تتعلم انها أول ما تصحى تطلع كيس اللحمة من الفريزر قبل ما تسرح شعرها وتغسل وشها و تتعلم تفكر فى طلبات المحروس وابن المحروس قبل طلباتها وبالتالى بقيت عادة خلاص عندها. 
المشكلة بقى فى نص الطريق بعد الست ما تكون سستمت نفسها على ان اهم حاجة فى حياة جوزها هو كيس اللحمة ...ويبدأ جوزها يتعود على كيس اللحمة ويفتكر ان كان فيه حاجة احلى من كيس اللحمة هو ما عاشهاش ...ويطالب أنه يعيشها وان دة من حقه وينسي ان هو اللى حرم نفسه ومراته منها اول الجواز لأنه علمها ان كيس اللحمة اهم حاجة عنده .
وتبدأ المشاكل تانى بين الغلبان المحروم من المتعة الحقيقية وبين امنا الغولة اللى اهم حاجة عندها انها تصحى من النوم تطلع كيس اللحمة. .....وينعقد تانى المجلس الأعلى بس المرة دى مش من الأم والخالات والعائلة ....دة مجلس الأصدقاء والشيوخ اللى بيقرروا ان أمنا الغولة خليها فى لحمتها وبابا غنوجها ...والغلبان المسكين يشوف حاله مع واحدة مش اهم حاجة عندها انها تطلع كيس اللحمة.

رحلة البحث عن السعادة

سألت كتير عن السعادة ، ياترى اية سبب السعادة ؟! هل هى الفلوس ولا الصحة ولا اية بالضبط ؟!  قررت اعمل رحلة بحث عن السعادة فى وشوش الناس . بصيت للغنى ، اكيد هو سعيد لان كل حاجة عندة بس لقيتة مش سعيد . بصيت للصحيح المعافى اكيد سعيد يقدر يعمل كل حاجة بس لقيتة مش سعيد . بصيت للايمان برضة لقيت ان الإيمان بيعمل سكينة وراحة بال بس مش سعادة . كل دى نعم ربنا انعمها علينا ، بس مش علشان نكون سعداء ، ربنا ادانا النعم دى علشان نستخدمها و نستفيد منها ونعرف طريق  السعادة .
 فشلت اعرف طريق السعادة من وشوش الناس ، قررت ابحث عنها فى دولاب الذكريات الخاصة بى . فتحت دولاب ذكرياتى و افتكرت اكتر ايام كنت فيها سعيدة ، لقيت ايام ما كنت منتظرة دخولى  لأول يوم فى الكلية اللى اخترتها بعد ماتعبت و اجتهدت فى الثانوية العامة .
افتكرت سعادتي وانا منتظرة ادخل بيتي الجديد مع الانسان اللى اخترتة و قررت أبدا معاة مشواري و مستقبلي . يعنى ممكن تكون السعادة فى الأنتظار ؟!
الانتظار يعنى الأمل ، الأمل فى بكرة و علشان يبقى عندى امل فى بكرة يبقى لازم يكون عندى طموح و حلم .
فعلا لما كان عندنا طموح وأحلام و امل فى بكرة كنا سعداء ، كما بننام على امل تحقيق حلمنا، بس لما كبرنا و بطلنا نحلم و بطلنا نستنى بكرة ، هربت السعادة من عيونا .
فرق كبير جدا بين انك تنام مستنى بكرة علشان  تحقق حلمك ،  و انك تنام علشان اليوم يخلص وبكرة برضة يخلص.
 لسة الحياة ادامنا طويلة و لسة ممكن نحلم و نستغل نعم ربنا علينا علشان نحقق أحلامنا ، نحلم بأي حلم جميل ،وننام على امل ان بكرة جاى علشان  نكمل حلمنا .

جيل الكونتور

لما كانت العائلات بتناسب بعضها ويختار الراجل زوجتة من عيلتها وأسرتها ، كانت الأمهات بتتنافس فى تربية بناتها احسن تربية،  تعلمهم الاتكيت و احترام الكبير ، وكانت الأم تعلم بنتها كل شؤون البيت و الطبخ والخياطة  ، وكان الرجال مقتنعين باختياراتهم و قانعين وراضيين بحالهم و مكانش جمال المرأة هو محور اهتمام الرجل ، وكان الزواج سعيد و الزوج و الزوجة متفاهمين ، ودة كان جيل الخمسينات و الستينات .
اختلف جيل السبعينات شوية فى طريقة اختيارة للزوجة،  اختار الزوجة الفول اوبشن ، يعنى فيها كل حاجة ، أدب و جمال و تعليم عالي  و بنت ناس وهنا ظهر جيل الفول اوبشن ، اهتمت الأمهات بتعليم بناتهم تعليم عالى و اهتموا بالتربية والأخلاق ، وعلشان الكمال للة  وحدة ، فجيل الفول اوبشن مابقاش فول اوبشن ودة زعل أزواجهم كتير و باختلاف الظروف و الاوضاع الاقتصادية  لمصر و بانتشار الفيديو كليبات و الجميلات العاريات اختلف اختيار الراجل ، ربط اختيارة بالزوجة الموزة اللى بتفكرة بنانسي عجرم او هيفاء وهبى او اليسا ، وهنا ظهر جيل الكونتور .
الكونتور دة اختراع عبقرى ، عبارة عن طريقة وضع المكياج  بطريقة عبقرية باستخدام بودرة عبقرية تغير كل ملامح الوجة ، تلاقى البنت صاحية من النوم الساعة اتنين او تلاتة الضهر عنيها محلقة و حمرا من السهرعلى النت ، ووشها اصفر زى اللمونة من أكل التيك اواى ، وشعرها مقصف وواقع من كتر البروتين و الكرياتين ، ولا مناخيرها اللى منفذة على زورها وفجأة تحط الكونتور تلاقى واحدة تانية خالص قمر اربعتاشر و تنزل تقابل البوى فريند بتاعها اللى انبهر بجمالها و قبل يتجوزها لأنها موزة آخر حاجة ، ويتم الجواز و يتقفل عليهم باب واحد و اجارك اللة على الصدمة اللى حتجرالة لما تغسل وشها ، يبدأ الأمور يتعامل معاها و يحاول يتاقلم على الشكل الجديد يلاقى الطباع مختلفة خالص و يلاقى أخلاقيات مختلفة عن أخلاق الوالدة و الأخت ماهو مافكرش فى موضوع الأخلاق دة خالص ماهى كانت كماليات ، ويبدأ يتغاضى عن الشكل و الأخلاق و يطالب بحياة زوجية مايلاقيش لان الموزة مش فاضية الا لنفسها و جمال كونتورها هى ماكذبتش علية ولا غشيتة ، هو ماطلبش زوجة هو طلب موزة  ، دة اختيارة و تبدا المشاكل اللى غالبا بتنتهى بالكرة و الشتائم    و خراب البيوت . 
اختيار الراجل لزوجة جميلة مش عيب ولا حرام ، العيب والحرام انة مايختارهاش الا لجمالها و ينسى يبحث فى أخلاقها و طباعها .
تجمل البنت مش حرام ولا عيب ، العيب والحرام أنها ماتهتمش الا بجمالها وتنسى واجباتها ودورها الحقيقى فى  المجتمع .

طشة ملوخية وشهقة

طشة ملوخية وشهقة كمان ، وحياتك تتقلب يا مان . اللي واقف يقعد واللى قاعد يقف واللى برة يدخل جوة واللى جوة يدخل جوة كمان .
طشة ملوخية وشهقة بريحة ، تنخشش جوة المناخير ، تخلى البطن تصوصو ، والدماغ تتعمر ، والخدود تحمر والعيون تبرق.
طشة ملوخية وشهقة تمام ، تخلى الكل يقف تعظيم سلام ، للحاجة اللى داخلة فرحانة بتضحك وشايلة  االحلة ومش عايزة الا كلمة تمام . والكل يقعد مكانة مستنى نصيبة بالتمام . وبانسجام وفرحة هتتك بتتك تخلص الحلة وتتلحس ،  وتفضل الملوخية طعمها على اللسان لآخر العمر يتحس  .
طشة ملوخية وشهقة  ، كل واحد عندة ملوخية مامتة أحلى ، كنتى بطشيها بالحب ولا بتشهقى باسماينا يا حاجة ؟!
طشة ملوخية وشهقة  ، كان فية عيلة ولمة ، كان فية خال وخالة وعمة ، والجد والجدة على راسهم ريشة وعمة .
طشة ملوخية وشهقة ، لميتى الجيران علينا يا حاجة  ، طالعة بحلة ونازلة بصينية  . اشى بتىفور واشى كيك و اشى  مهلبية .
طشة ملوخية وشهقة  بدور عليكى مش لاقياكى ياحاجة . غبتى وقولتى عدولى ، ادينى بعد والأيام ما يتخلص   -.  رحتى واخدتى  العيلة واللمة ، وطعم الايام الحلوة .
رحتى وراحت معاكى الضحكة الصافية ، بقيت ضحكة صفرا وباهتة .
مقدرش اقولك ارجعي لانى عارفة انك مش راجعة ،  كفاية على عايشة  بدعواتك لية .بدعيلك فى كل صلاه تكونى فى الجنة متهنية .

هابى فالانطين داى

هابى فالانطين داى ياجماعة .... علينا وعليكم يارب . انهاردة عيد الحب العالمى ... عيد جميل فى كل بلاد العالم الا فى مصر ام الدنيا . كالعادة جدال كل سنة . البعض يقول انه حراااااام ...الاحتفال بعيد الحب حراااااام انتم بتتشبهوا بالكفار . والبعض يقولك وهو مبرق عنيه : طيب ماهو الشعب اهو معاه فلوس يشترى دباديب ويبدأ يحسب كم ديشيليون جنية اتصرفوا على الدباديب . اما الستات دول بقى عسل كل واحدة تستنى الموكوس ( على كلامها ) حيجيب لها ايه !وهى عارفة كويس انه حيطنش ...بس لازم تتعشم و تتكبس علشان تعمل مشكلة و تمصمص شفايفها وتتحسر على حظها. ...والستات اللى بيشتغلوا يسألوا بعض نفس السؤال : هيه .. جوزك جابلك ايه ؟! وهم عارفين كويس ان جوزها مش حيجيب لها حاجة بس لازم تحسرها وخلاص .
ويبدأ الجدال قبل العيد بأسبوع وبعده بأسبوع  وعالفسبووك تنزل الكومنتات هى هياها من كم سنة تنزل كأنها جديدة والناس تشيرها اكنها اول مرة تشوفها والتانيين يعملوا لايك و هههههههه على اساس انها أول مرة يشوفوها . والشوارع فجأة تلاقيها ادزحمت والمواصلات بقيت مستحيلة.  طيب هو مين اللى بينزل و بيزحم الشوارع اذا كان ستات مصر كلهم قاعدين ممصمصين شفايفهم ... على أساس ان أزواجهم بيحبوهم السنة كلها بس نسوا اليوم دة! معقول شوية العيال المراهقين دول هم اللى زاحمين الشوارع !
فعلا يا جماعة مصر ولادة ومصر شابة. 
بس يا ترى احنا فعلا بنحب بعض !!! ولا اليوم دة تمثيل فى تمثيل ؟!  زى حياتنا كلها مابقت تمثيل فى تمثيل . الغريبة ان مصر هى الدولة الوحيدة اللى عندها اتنين عيد حب !  على كل الشتيمة والتحريم والخلافات الزوجية والعائلية بسبب العيد دة.  يعنى احنا عايشين حالة من الازدواجية ... بنكفر بعض وبنتكلم على بعض و بنقرص من تحت لتحت. والراجل يخون مراته والست مسميه جوزها (الموكوس ) والراجل  مسميها ( الحكومة ) . والاولاد مخنوقين من اهاليهم . ونسيب كل دة ونعمل عيدين حب
ودى هى  ( الازدواجية الأولى  ) ، أما الازدواجية الثانية فهي اننا مستنيين تهنئة وهدايا من الطرف الآخر... منين يعنى الطرف التانى مكبردماغه منك السنة كلها ومنين بتستنى يعبرك بهدية ! .
 الازدواجية الثالثة بتاعة الجماعة اللى بيحرموا عيد الحب طيب ما تحرموا الكذب على الزوجة والخيانة والبخل والأنانية وقهرة الزوجة لما تلاقى زوجها اللى وقفت معاه وضيعت شبابها عليه واهملت نفسها علشانه  و فضلته على نفسها يسيبها ويخونها ويروح يتمتع مع واحدة تانية فى إطار شرع اللة .
فين صوتكم بحرمانيه ان الراجل يسيب بيته ومراته وأولاده وما يصرفش عليهم الا الفتات علشان يصرف على زوجه تانية قهر بيها الزوجة الأولى ؟!
اليوم ده فى مصر ( قصدي اليومين دول ) يوم سيء جدا على الزوجات لانه بيفكرهم بالفراغ العاطفى ، حتى على الخطاب و الحبيبة لانهم بيعانوا من ارتفاع الأسعار. حتى الدبدوب الاحمر بيكون تعيس لانه ساب بلده الصين وجاى يمثل أنه فرحان معانا .
الحب الحقيقى مش محتاج يوم ويعدى. ... الحب الحقيقى مش هدية دبدوب أحمر .....الحب الحقيقى اننا نكون متصالحين مع نفسنا ومع الآخرين وأننا نحترم بعض . لما نوصل للحب الحقيقى  ساعتها نعمله عيد الفلانتين .

رحلة انتخابات

بدأت انتخابات الأندية ،  الناس متحمسة جدا ، هل السبب فى الغرامات اللى بيقولوا حتطبق على اللى ماانتخبش ، ولا إيمانا منهم ان صوتهم امانة بصراحة مش عارفة . قررت اذهب إلى الانتخابات برضة مش عارفة لية ؟ هل علشان صوتى أمانة ولا علشان ماادفعش. .. .   ... اللة اعلم منى بما فى نيتى . المهم ذهبت .
مشهد جميل جدا عند البوابة ، يافطات لكل السادة المرشحين و عمال نظافة لابسين ملابس عليها اسم مرشح وعاملين نفسهم بينظفوا . واحد بيبيض الرصيف ولابس جاكت علية اسم مرشح . شباب زى الورد فى كل مكان منتشرين بيرحبوا بيك بشدة و بيفرقوا علينا الورق .... ورق ورق ورق فى كل مكان ..  الدنيا بتمطر ورق ياجدعان ، والناس بتاخد الورق ويرموا فى الأرض . وعامل النظافة يلم الورق ويوزعة على الشباب تانى .
قابلتنى بنوتة أمورة على البوابة ومعاها كرتونة عصير عليها اسم مرشح وناولتنى واحدة ولما شكرتها قالتى وانت طالعة كمان حنديك بس انتخبى فلان . وجانبها واحدة قوية فعالة بتنادى بأعلى صوت انتخبوا رقم أربعة ... انتخبوا رقم أربعة .. اكنك داخل محطة مصر و اديتنى باتية و دخلت النادى بصعوبة وجوة النادى وانا متجة ناحية مكان الصناديق يقابلنى ناس أشكال وألوان والكل يدينى ورق و حاجات حلوة كتير ، اقلام ...  مساطر...  كراسات ... مية معدنية .. ووصلت أخيرا إلى مكان الصناديق ، ممر طويل متقسم بالطول دخول و خروج .
دخلت من ممر الدخول وعلى يمينى وشمالى من ممر الخروج  شباب زى الورد بيرموا على هدايا جميلة وورق . بعدهم المرشحين آخر ذوق وادب ، كل واحد يوقفنى شوية يقولى انتخبينى انا ابن النادى انا رقم كذا ... قابلني لواء مرشح ذوق جدا قلتلة انا رابعة،  قالي يا فندم انا لواء بحرية معاش وانت اختى. .. عديت  على رئيس النادي بنفسة كان واقف وسلم على بالايد وطلب منى انتخبة. .. اية الجمال دة  !!! اية البساطة دى!!!!!
اخيرا وصلت الصناديق والكل بيضحك فى وشى وبيقولى بكل تواضع انتخبينى. 
انتخبت الحمدللة ، واتجهت لممر الخروج ، محدش كلمنى خالص ، كل المرشحين مشغولين   باللى داخل ،  ودخلت الممر وعلى شمالى رئيس النادى ، ناديت علىة علشان اسلم علية احيية مابيردش ولا بيبص ، لقيت لواء البحرية بيبصلى جامد جدا وبيتكلم فى الموبايل ، اترعبت وخفت أسترها يارب و النبى كنت بهزر ، بستظرف نفسى ، والمصحف لا اعرف رابعة ولا خامسة ولا ساتة  ، يخربيت لسانى وفجأة اترزعت حتت قفا ..... اة  يالهوووى فرج وصل،  انا مش اد فرج دة انا عندى عيال،  ابص الاقى شاب من الشباب اللى ذي الورد اللى على الجانبين  ، يعتذر لى  الشاب ويقولى اسف يا طنط كنت برمى الهدية على طنط اللى داخلة من ممر الدخول  وخبطت فى قفا  حضرتك ، لا ابدا  يا بنى حصل خير ... بقى طنط اللى داخلة ليها الهدايا وانا اللي خارجة لي القفا  ؟!! يافرحة امك  بيك.
وقفا ورا قفا، اضطريت اوطى راسي خالص بدل مااخد بالقفا . وخرجت أخيرا من الممر وانا فى غاية الارهاق والعطش ، رحت على البوابة لقيت البنوتة الامورة اللى وعدتنى بالمياة عند الخروج . يابنتى هاتيلى مية ... تعتذر البنت لان معندهاش مياة ، خلصت كلها . وابص لها   الاقيها فى ايديها كرتونة كبيرة بتوزع المياة على اللى داخل  . كنت لسة حفكرها بوعدها بس افتكرت القفا المتين اللى علمنى  مااطلبش من المرشح اللى وعدنا بية، ولو اتجرات وطلبت  ، لازم أصدق المرشح لو قالى معندوش  حتى لو شايفاة بعيني انة عندة .
جريت بسرعة للبيت  وانا فى الطريق بدندن اغنية محمود عبد العزيز فى فيلم الكيف ...
 اة ياقفا ... اة يا قفا ...اة ياقفا